Shark tank
أحد البرامج الأساسية لأى رائد أعمال .. و لأى مبدع نفسه يكون مليونير
البرنامج نفسه ممكن نتكلم عنه كتير فى المستقبل .. و ده مش حيكون المقال الوحيد عنه ..
بس المقال ده عن فكرتين .. فكرتين بس ..
و فى الجزء التانى .. حنشوف التلات أفكار التانيين ..
و الخطوات لكل واحدة منهم مشابهة لبعض
مثلاً المنتج الأول : ava the elephant …
الخطوة الأولى : فكر فحل لمشكلة موجودة .
لأم كانت دايماً تتخانق مع طفلتها الصغيرة عشان تديها الدوا نقط .. و البنت لأنها حفظت شكل القطارة بقت تطلع تجرى و تهرب و كرهت الدوا .
الام عملت موديل بسيط جداً و بدائى جداً لفيل بودان كبيرة و زلومة .. و قطارة الدوا بتدخل فى الزلومة .. و تقول للطفل يلا بوس الفيل و تحطله الدوا بالزلومة فبقه .
الخطوة التانية : دور على حد عمل كده قبلك ولا لا ..
لو كانت فكرتك تم تنفيذها قبل كده .. ماتيأسش … يمكن إنت عملتها أحسن ..
بس لو كانت محدش عملها قبلك .. يبقى إنت محتاج توثقها و تحميها ( حقوق نشر و طبع ) .. و حقوق ملكية و براءات إختراع .
هى فعلاً عملت براءة إختراع للفكرة الصغننة دى .
الخطوة التالتة : دور عالإنتشار و / أو التمويل .
و ده اللى صاحبت الفكرة عملته .. راحت لبرنامج shark tank و قدمت فكرتها .. و قدرت تاخد تمويل بسيط جداً .. و خلال أقل من سنة .. الفكرة أصبحت صناعة قوية و منتج مشهور جداً .. و حول لصاحبة الفكرة ثروة مش بسيطة … (لسة مش مليون .. بس بما يكفى إنها تعيش من غير شغل تانى .. باقى عمرها ) .
المنتج التانى : restreader
الخطوة الأولى : فكر فحل لمشكلة :
صاحب الفكرة الرائعة دى نضارته دايماً كانت بتقع منه ..
حبل على رقبته .. وحش
يعلقها فى جيب التيشيرت .. تقع ..
يعلقها فرقبة القميص .. تقع ..
ببساطة عمل قطعة معدنية صغيرة .. و فيها إتنين مغناطيس من الناحيتين ..
قطعة مغناطيس تحت القميص .. و قطعة فوق القميص ..و النضارة بتمسك فى الحمالة زى الصورة .
الخطوة التانية : دور على حد عمل كده قبلك ولا لا ..
فعلاً كان فى حد عمل الفكرة قبل كده … الراجل ببساطة ماخترعش حاجة جديدة هنا .. لا .. هو ببساطة لما عرف كده … دور على صاحب برائة الإختراع .. و إشتراها منه.. بكام ؟ .. ب 5.000 دولار .. خمسة آلاف دولار … بس .
و خد الفكرة و راح shark tank .. و باع 65% من الشركة دى فمقابل 150.000 دولار ..
و مش بس كده ..
الخطوة التالتة : دور عالإنتشار و / أو التمويل .
لورى جرينيير .. أحد أشهر سيدات الأعمال على قنوات التسوق الأمريكية .. هى اللى إشترت منه النسبة دى .. و خلال أقل من سنة .. حولته فعلاً لميليونير عن طريق مساعدة المنتج على الإنتشار و الإنتاج على التيليفزيون الأمريكى .
…
السؤال دلوقتى ..
إنت إيه أكتر حاجة محتاجها عشان تعمل زيهم ؟
