موبايلك سامسونج ؟
شاشتك سامسونج ؟
تيليفزيونك سامسونج ؟
لابك سامسونج ؟
كتير صح ؟
طيب معلش …. الرز و السكر بتوعك ؟ … تصدق إنهم برضو ممكن يكونوا بتوع سامسونج ؟
مش مصدق … طيب تعالى أحكيلك الحكاية
سنة 1938 , أيام ما كان عمر الشريف بيستعد عشان يرحل الإنجليز من مصر , و يوسف بيك وهبى كان بيقسم بأيتها الآلهة ..
كان عم “بيونج شول لى ” بيفتح محل صغنن كده بتاع سكر و رز … و سماه سامسونج .. اللى هو بالكورى يعنى “تلات نجوم ” .. كل نجمة بتشير لقيمة معينة من تلات قيم
خليك كبير
خليك قوى
خليك خالد
الراجل ماكانش فاتح محل يقعد فيه لحد العصر و يحط جوز كراسى و شيشة على الباب و شكراً على كده … لا .
الراجل كان كل قرش بيكسبه بيحطه فتجارته “عبد الغفور البرعى ستايل ” .. و كان مؤمن إن مستقبل كوريا كله واقف على محله هو .. و عشان كده .. طور من تجارته من المواد الغذائية .. للأجهزة المنزلية .. و هكذا .
سامسونج ماينفعش نتكلم عنها فبوست ولا إتنين … دى حتبقى سلسلة بوستات عشان نحكى الحكاية صح ..
بس خلينا نعمل شوية إعلانات بسيطة عن القصة دى ..
مثلاً إن ف 1995 رئيس شركة سامسونج “كون هى لى” .. اللى هو يبقى إبن عمك “بيونج شول لى ” الصغير إدى هدايا لقرايبه و صحابه شوية تيليفونات لسة كانت حتنزل السوق بعدها بشهر .. و بعدين صحابه رجعوله التيليفونات عشان كان فيها عيب بسيط .. العيب اللى شركات كتير بعد ما عملية الإنتاج بتنتهى و يطلع عيب بالمنظر ده , يروحوا حاطينه فى الإعلان و يسموه “ميزة – FEATURE” .. مثلاً زى ما الآى فون الجديد كان ممكن إبنك الرضيع يتنيه لو ضغط عليه شوية , أو زى ما كارت شاشة فإنفيديا بعد ما نزل السوق إكتشفوا إن فيه جزء فى الشريحة مش شغال .. راحوا قايلين عشان مايستهلكش باور كتير ..
رئيس سامسونج كان عنده عرق صعيدى ولا مؤاخذة … راح لامم الإنتاج بالكامل .. (150.000) عدة تيليفون كانت لسة حاتنزل السوق جديدة نوفى … و راح مولع فيهم .. قدام الموظفين بالكامل (2000 موظف و موظفة) .. عشان يشوفوا إن تعب و مجهود و سهر الليالى ملوش قيمة لو كان فى عيب بسيط فى المنتج كده . .. زى ما بنقول إحنا ” اللى أهم من الشغل .. تقفيل الشغل ” … و دى كانت بداية حملة ساسمونج الإعلانية الحقيقية “الجودة أولاً = QUALITY FIRST”
و عشان كده حلم عمك “بيونج شول لى” أصبح حقيقة فزمن قياسى .. و سماسونج فعلاً دلوقتى بتمثل أكتر من خُمس إقتصاد كوريا الجنوبية بالكامل ..
التقدم اللى تقدمته كوريا الجنوبية .. ساسمونج مسئولة عن جزء ضخم منه … و الإقتصاديين فى العالم بيقولوا إن أى دولة عشان تتقدم بشكل ملحوظ محتاجة على الأقل 100 سنة .. إلا دولتين بس على مدار التاريخ الحديث اللى كسروا القاعدة دى .. كوريا الجنوبية .. و إسرائيل .
.
.
عايز تعرف الجزء التانى فى إيه ؟ ..
و تعرف مين اللى بنى أطول برج فى العالم فدبى .. و بناه إزاى ؟
و كمان تعرف مين اللى ورا التسويق والإعلانات بتاعت سامسونج .. و كان شغال فين قبل كده ؟
إعمل فولو و إستنى الجزء اللى جاى .. جاى أهه .. فى السكة … بيترفع خلاص ..
